Дар доираи баргузории курси такмили ихтисос барои котибони судҳои вилоятҳо ва шаҳру ноҳияҳо аз рӯйи барномаи “Сиёсати давлатӣ дар самти муқовимат ба коррупсия дар Ҷумҳурии Тоҷикистон” бо собиқадори мақомоти ҳифзи ҳуқуқ Салимзода Шерхон Одина лексия-мубоҳисаи озод доир карда шуд.
Зимни баргузории лексия-мубоҳиса Салимзода Шерхон бо шунавандагони курс оид ба ташаккули низом ва сохтори мубориза бо коррупсия дар шароити Ҷумҳурии Тоҷикистон дар солҳои соҳибистиқлолӣ суҳбат намуд.
Қайд карда шуд, ки Тоҷикистон бо мақсади таъмини волоияти қонун, таъмини афзалияти ҳуқуқу озодиҳои инсон ва адолати иҷтимоӣ аз рӯзҳои аввали соҳибистиқлолӣ масъалаи пешгирӣ ва муқовимат бо омилҳое ба мисли коррупсияро аз вазифаҳои аввалиндараҷаи худ қарор додааст. Дар ин росто бо мақсади беҳтар намудани заминаҳо ва сарчашмаҳои қонунгузории соҳа дар кишвар як қатор қонуну қарорҳо, барномаҳо ва лоиҳаҳои нав қабул карда шуда, татбиқи амалии худро пайдо намудааст. Ба ғайр аз ин дар кишвар бо мақсади ба роҳ мондани назорати ҷиддӣ дар ин самт мақомоти салоҳиятдор Агентии назорати давлатии молиявӣ ва мубориза бо коррупсияи назди Президенти Ҷумҳурии Тоҷикистон таъсис карда шуд. Ҳамаи ин амалҳо ва талошҳои Роҳбарияти кишвар боис ба он гашт, ки сатҳи ҷинояткории коррупсионӣ дар мамлакат паст карда шуда, волоияти қонун ва адолати иҷтимоӣ таъмин карда шавад.
Дар рафти лексия ҳамчунин шунавандагони курс доир ба масъалаҳо ва муаммоҳои мавҷудаи соҳа ба собиқадори мақомоти ҳифзи ҳуқуқ Салимзода Шерхон Одина саволҳо пешниҳод намуда, ҷавобҳои мушаххас гирифтанд.
Баъд аз фарҷоми лексия - мубоҳисаи озод собиқадори мақомоти ҳифзи ҳуқуқ Салимзода Шерхон аз Маркази омӯзиши “Мактаби давлатдории Эмомалӣ Раҳмон” дидан намуда, бо корҳои таҳқиқотии дар марказ гузаронида шинос гардид. Салимзода Шерхон ба меҳнату заҳмати муаллифони асари илмии “Мактаби давлатдории Эмомалӣ Раҳмон: масъалаҳои ташаккул ва рушд” баҳои баланд дода, фаъолияти чунин маркази омӯзишӣ-таҳқиқотиро дар Академияи идоракунии давлатии назди Президенти Ҷумҳурии Тоҷикистон саривақтӣ ва зарурӣ шуморид.
Академияи идоракунии давлатии назди
Президенти Ҷумҳурии Тоҷикистон
