Аз ҷониби Агентии хизмати давлатии назди Президенти Ҷумҳурии Тоҷикистон ҷиҳати иҷрои талаботи банди 58 Нақшаи чорабиниҳо оид ба иҷрои вазифаҳое, ки дар Паёми Президенти Ҷумҳурии Тоҷикистон аз 21 декабри соли 2021 «Дар бораи самтҳои асосии сиёсати дохилӣ ва хориҷии Ҷумҳурии Тоҷикистон» зикр гардидаанд (бо амри Президенти Ҷумҳурии Тоҷикистон аз 7 январи соли 2022, №АП-144 тасдиқ карда шудааст), тадбирҳои зарурӣ андешида мешаванд.

Мувофиқи банди 58 Нақшаи мазкур интихоб ва таъини кадрҳои донандаи забонҳои хориҷӣ ба мансабҳои мақомоти давлатӣ ва пас аз 10 сол ҳамчун шарти ҳатмӣ дар қонунгузорӣ муқаррар кардани ба мансабҳои роҳбарикунанда интихобу таъин намудани шахсони донандаи на кам аз ду забони хориҷӣ (русӣ ва англисӣ) масъалагузорӣ карда шуда, муҳлати иҷро давоми солҳои 2021-2030, иҷрокунандагон Агентии хизмати давлатӣ, Вазорати адлия, вазорату идораҳои дахлдор муқаррар гардидаанд.

Аз ҷониби Агентии хизмати давлатӣ ҳамчунин масъалаи аниқ намудани доираи забонҳои хориҷии байналмилалӣ мавриди омӯзиш қарор дода шуд.

Муайян карда шуд, ки забонҳои расмӣ ва кории созмонҳои бонуфузи байналмилалӣ, ки Ҷумҳурии Тоҷикистон узви онҳо мебошад, аз ҷумла Созмони Милали Муттаҳид - забонҳои англисӣ, русӣ, фаронсавӣ, хитоӣ, испанӣ ва арабӣ, Созмони ҳамкории Шанхай -русӣ ва хитоӣ, Иттиҳоди Давлатҳои Мустақил-забони русӣ, яъне 6 забони хориҷии байналмилалӣ муқаррар карда шудаанд.

Ҳамчунин ҷиҳати иҷрои дастури мазкур қонунгузории соҳаи хизмати давлатӣ зина ба зина такмил дода шуда, зимни интихоб ва таъини кадрҳо ба мансабҳои мақомоти давлатӣ ба донандагони забонҳои хориҷӣ (ҳатман донистани як забони хориҷии байналмилалӣ дар давоми то 10 сол) бартарӣ дода шуда, ҷобаҷогузории кадрҳо ба мансабҳои роҳбарикунанда пас аз 10 сол танҳо дар мавриди донистани на кам аз ду забони хориҷии байналмилалӣ (бо бартарии забонҳои русӣ ва англисӣ) ба роҳ монда мешавад.

Дар робита ба ин аз ҷониби Агентии хизмати давлатии назди Президенти Ҷумҳурии Тоҷикистон лоиҳаи фармони Президенти Ҷумҳурии Тоҷикистон «Дар бораи ворид намудани тағйиру иловаҳо ба фармони Президенти Ҷумҳурии Тоҷикистон аз 10 марти соли 2016, №647» вобаста ба Низомнома дар бораи тартиби гузаронидани озмун барои ишғоли мансабҳои холии маъмурии хизмати давлатӣ таҳия карда шуд, ки тағйироту иловаҳои пешниҳодгардида бо фармони Президенти Ҷумҳурии Тоҷикистон аз 1 апрели соли 2023, №544 тасдиқ ва барои иҷро пещниҳод карда шуданд.

Тибқи тағйироти нав дар Низомномаи мазкур аз ҷумла, ба замимаи 2 (Варақаи баҳодиҳии сифатҳои касбӣ ва қобилияти кории довталабон)-и он тағйирот пешниҳод карда шуда, дар он сутуни шашум (донистани забонҳои хориҷӣ) пешбинӣ карда шуда, минбаъд сатҳи донистани забонҳои хориҷӣ аз ҷониби довталабони ишғоли мансабҳои холӣ дар алоҳидагӣ баҳогузорӣ карда мешавад. 

Бо назардошти дар таҳрири нав қабул ва ё такмил дода шудани дигар санадҳои меъёрии ҳуқуқии танзимкунандаи технологияҳои кадрӣ (озмун барои ишғоли мансабҳои холии хизмати давлатӣ, баҳодиҳии фаъолияти хизматчиёни давлатӣ, ҷойивазкунии ҳайати роҳбарикунандаи хизмати давлатӣ ва ғайраҳо) Низомнома дар бораи захираи кадрҳои хизмати давлатии Ҷумҳурии Тоҷикистон низ дар таҳрири нав таҳия ва бо фармони Президенти Ҷумҳурии Тоҷикистон аз 27 январи соли 2023, №523 тасдиқ карда шуда, василаи кадрии мазкур ба талаботи имрӯзаи рушди хизмати давлатӣ мувофиқ гардонида шуд.

Дар санади мазкур барои кадрҳои захира талаботи нав аз ҷумла, донистани забонҳои хориҷӣ дар асоси муқаррароти банди 58 Нақшаи чорабиниҳо оид ба иҷрои вазифаҳое, ки дар Паёми Президенти Ҷумҳурии Тоҷикистон 21 декабри соли 2021 «Дар бораи самтҳои асосии сиёсати дохилӣ ва хориҷии Ҷумҳурии Тоҷикистон» зикр гардидаанд (бо амри Президенти Ҷумҳурии Тоҷикистон аз 7 январи соли 2022, №АП-144 тасдиқ карда шудааст), пешбинӣ гардид.

Дар робита ба ин тавсия дода мешавад, ки дар давраи ҳозира ба захираи кадрҳо номзадҳое пешниҳод ва дохил карда шаванд, ки ҳадди ақал як забони хориҷии байналмилалиро медонанд.

Дар Низомномаи мазкур синни ниҳоӣ барои кадрҳои захиравии мансабҳои сиёсӣ ва категорияи олӣ 5 сол зиёдтар (то 55-солагӣ) пешбинӣ шуда, кадрҳои захиравӣ ба ғайр аз мансабҳои пешниҳодшуда боз ба мансабҳои баробар ё пасттари роҳбарикунанда таъин карда мешаванд. Барои танзими дурусти мансабҳои нигоҳдошташаванда низ захираи кадрҳо пешбинӣ гардидааст.

Рӯйхати захираи кадрҳо охири сол барои як соли минбаъда (аз 1 январ то 31 январ) тартиб дода шуда, давоми сол ба он номзадҳои нав  ворид карда намешаванд.

Дар Низомномаи мазкур боз дигар навгониҳо ҷой доранд.

Дар робита ба ин барои хизматчиёни давлатии Ҷумҳурии Тоҷикистон азхуд намудан ва донистани забонҳои русӣ, англисӣ, немисӣ, фаронсавӣ, испанӣ, хитоӣ, арабӣ бо бартарӣ додан ба забонҳои русӣ ва англисӣ тавсия дода мешавад.

                             Файзулло Фақеров - корманди Агентии хизмати давлатӣ