User Rating: 0 / 5

Star InactiveStar InactiveStar InactiveStar InactiveStar Inactive
 

Санаи 9 апрели соли равон ҷаласаи ҳайати мушовараи Агентии хизмати давлатии назди Президенти Ҷумҳурии Тоҷикистон баргузор гардида, дар он натиҷаҳои фаъолияти Агентии хизмати давлатӣ дар семоҳаи якуми соли 2021 ва вазифаҳо барои семоҳаи дуюми соли 2021, баргузории аттестатсияи хизматчиёни давлатии мақомоти давлатӣ дар соли 2020 ва мониторинги ҷалби занону духтарони лаёқатманд ба хизмати давлатӣ дар соли 2020 мавриди баррасӣ қарор дода шуд.

Ҷаласаро директори Агентии хизмати давлатӣ Давлатов Ҷ.М. ифтитоҳ бахшида, аз рӯи масъалаҳои пешбинишуда муовинони директори Агентии хизмати давлатӣ Қосимзода Г.Ҷ., Аюбӣ Б.О. ва сардори шуъбаи идоракунии захираҳои инсонӣ Юнусзода И.Ғ. гузориш доданд.

Қайд гардид, ки мувофиқи таҳлили охирини маълумотҳои оморӣ дар бораи ҳайати миқдорӣ ва сифатии хизматчиёни давлатӣ дар мақомоти давлатӣ ва мақомоти худидоракунии шаҳрак ва деҳот теъдоди умумии бастҳои корӣ 21605 воҳидро ташкил дода, теъдоди хизматчиёни давлатии амалкунанда 19247 нафар (89,0 фоиз) ва шумораи ҷойҳои холӣ 2358 адад (10,9 фоиз) мебошад. Аз ин шумора дар мақомоти марказӣ 12181 нафар (занон 2927 нафар ё 24,0 фоиз), мақомоти маҳаллӣ 3696 нафар (занон 990 нафар ё 26,7 фоиз) ва мақомоти худидоракунии шаҳрак ва деҳот 3369 нафар (занон 574 нафар ё 17,0 фоиз) фаъолият доранд.

Ба ҳолати 1 январи соли 2021 аз 19210 нафар хизматчиёни давлатӣ 4485 нафар ё 23,3 фоизро занон ташкил медиҳанд.

Кадрҳои роҳбарикунанда, ки дар мансабҳои сиёсӣ, категорияҳои олӣ, якум, дуюм, сеюм ва чорум фаъолият мекунанд, 5718 нафар буда, аз ин шумора 1098 нафар ё 19,2 фоиз занон мебошанд.

Таҳлил нишон медиҳад, ки теъдоди умумии занон нисбат ба ҳамин давраи соли 2020 78 нафар ва дар мансабҳои роҳбарикунанда 51 нафар зиёд гардидааст.  

Қайд гардид, ки дар семоҳаи якуми соли 2021 масъулини Агентии хизмати давлатӣ дар 109 (соли 2020-106) ҷаласаи комиссияҳои озмунии мақомоти давлатӣ иштирок намуданд.

Дар ин давра барои ишғоли 1302 (соли 2020-1223) мансаби холии маъмурии хизмати давлатӣ озмун эълон гардида, ба 1103 (соли 2020-1071) мансаби холӣ бо иштироки 2181 нафар, аз он зан-487 (соли 2020-2047, зан- 453) нафар довталаб озмун гузаронида шуда, 884 нафар, аз он зан-191 (соли 2020-771, зан-183) нафар довталабон барои ишғоли мансабҳои холии маъмурии хизмати давлатӣ тавсия дода шуданд.

Дар семоҳаи якуми соли 2021 кормандони Агентии хизмати давлатӣ дар 32 (соли 2020-24) ҷаласаи комиссияҳои аттестатсионии мақомоти давлатӣ (мақомоти марказӣ-20 ҷаласа ва мақомоти маҳаллӣ-12 ҷаласа) иштирок намуданд.

Дар давраи ҳисоботи рафти иҷрои қонунгузории хизмати давлатӣ дар мақомоти иҷроияи ҳокимияти давлатии вилояти Суғд ва ноҳияи Мастчоҳ мавриди санҷиш қарор дода шуд.

Дар ин давра Агентии хизмати давлатӣ дар ҳамкорӣ бо Академияи идоракунии давлатӣ, мақомоти давлатӣ 8 курси таълимӣ, аз ҷумла-1 курси азнавтайёркунӣ, 7 курси такмили ихтисоси хизматчиёни давлатиро дар Академияи мазкур ва шаҳри Хоруғ доир намуд, ки дар онҳо 493 (зан-199) нафар хизматчиёни давлатӣ ба таълим фаро гирифта шуданд.

Инчунин дар доираи ҳамкориҳои Агентии хизмати давлатӣ, Академияи идоракунии давлатӣ ва Бунёди мазкур соли 2020 барои хизматчиёни давлатӣ магистратураи дусола (таҳсил дар баробари фаъолияти корӣ) бо ихтисоси «Идоракунии давлатӣ» ташкил карда шуда, дар он 51 (зан-9) нафар хизматчиёни давлатӣ ба таҳсил фаро гирифта шудаанд.

Соли 2021 бошад, ба магистратураи мазкур боз 64 (зан-13) нафар хизматчиёни давлатӣ аз мақомоти марказии ҳокимияти давлатӣ қабул карда шуданд.

Зимни баррасии масъалаҳо, инчунин мушовири Бахши Ёрдамчии Президенти Ҷумҳурии Тоҷикистон оид ба масаълаҳои кадрҳо Олимшо М. суханронӣ намуд.

Бо қарорҳои ҷаласа барои ислоҳи камбудиҳои ҷойдошта ва тақвияти фаъолияти Агентии хизмати давлатӣ, аз ҷумла дар самти беҳтар кардани сифати баргузории аттестатсияҳо ва ҷалби занону духтарони лаёқатманд ба хизмати давлатӣ ба роҳбарони воҳидҳои сохторӣ ва дигар масъулин дастуру тавсияҳои мушаххас дода шуд.

         

        Агентии хизмати давлатии назди

       Президенти Ҷумҳурии Тоҷикистон